Përdorimi i telefonave konsiderohet një nga shkaktarët kryesorë të aksidenteve në kryeqytet dhe në vend. Nga ekspertë të komunikacionit u tha se si masë parandaluese duhet të jetë analiza e aksidenteve në komunikacion si dhe hulumtimi i elementeve të faktorëve që ndikojnë në ato analiza.

Analiza e aksidenteve në komunikacion, si dhe hulumtimi i elementeve të faktorëve që ndikojnë në aksident, duhet të merren si masë preventive sipas ekspertëve të komunikacionit.

“Si masë preventive, që duhet me marrë, është analiza e aksidenteve dhe hulumtimi i elementeve të faktorëve të cilët ndikojnë në ato analiza të aksidenteve, dhe pastaj me i marrë edhe masat preventive”, ka thënë Nol Dedaj, ekspert i komunikacionit.

“Aplikimi i telefonit gjatë drejtimit të automjetit, është kundërvajtje, e cila nuk paraqet nivel të rrezikshmërisë së lartë për shkak të shpejtësisë së vogël të lëvizjes”, vazhdoi ai.

Nga njësiti i trafikut të kryeqytetit, renditin faktorët që po ndikojnë në shkaktimin e aksidenteve në komunikacion.

“Shkaktarët janë disa: Me bindjen time dhe në bazë të analizave të cilat i bëjmë, shkaktari kryesor për momentin në Prishtinë dhe tërë Kosovën, është përdorimi i telefonit .Përdorimi i telefonit është jashtëzakonisht i rrezikshëm, pastaj normal vjen edhe shpejtësia edhe mosrespektimi i rregullave tjera të cilat i kanë përcaktuar ekspertët”, ka thënë Vedat Zuka, shef i operatives së trafikut në kryeqytet.

E marta në kryeqytet u karakterizua me mjegull. Kujdes dhe respektim i rregullave në komunikacion, u kërkuan nga Policia. Nëntori, dhjetori, janari e shkurti po cilësohen si muajt më kritikë sa i përket ndotjes së cilësisë së ajrit.

“Nga fillimi i muajit nëntor, dhjetori, janari, shkurti, janë muajt më kritik sa i përket, ndotjes së cilësisë se ajrit, sepse regjistrojmë vlera më të larta, konform standardeve, krahasuar me periudhën tjetër të vitit kalendarik”, ka thënë Shkumbin Shala, specialist për cilësinë e ajrit.

Për mbrojtjen e cilësisë së ajrit, kujdes u kërkua nga secili qytetar.